超級葡萄！Apple 實習生月薪7000美金

相信唔少人都希望可以去 Apple 工作，窺探一下呢個成功企業嘅秘密。相信睇完呢個 post，會令大家更想加入呢間又神秘又多福利嘅企業。外國有網站就訪問咗一名 Apple 前實習生，佢表示在 Apple 實習月薪接近 $7,000 美金，亦透漏 Apple 內部嘅超保密工作氣氛。葡萄 mode 嚟講，小記會認為去 Apple 做嘢一定係好大壓力！

Apple 希望為消費者帶來驚喜，所以為 Apple 工作，任何有關工作嘅消息都要嚴格保密。而且員工會被禁止進入部分大樓，在不同部門工作嘅員工都唔會知道彼此嘅工作係咩。公司範圍內亦唔可以影相。

有時 Apple 員工甚至會於唔知道自己做緊咩嘅情況下工作，例如有參與 2010 年 iPad 製作嘅員工就製作咗 9.7 吋屏幕兩年時間，都唔知道屏幕會拎嚟做咩，直到 Steve Jobs在台上發佈 iPad 嘅消息。

前實習生話在 Apple 實習，時薪有 $38 美金，一個月平均賺到 $6,700 美金。當一星期工作超過 40 個鐘，額外時間時薪係 1.5 倍，一星期工作超過 60 個鐘，額外時間時薪更加係 2 倍。

Apple 仲會於舊金山區提供免費宿舍俾實習生，如果唔想同其他實習生住，Apple 就會提供每月 $1,000 美金俾實習生租屋。Apple 更會提供 $3,300 俾來自唔同地方嘅員工，去應付為工作搬到舊金山嘅機票、搬運等支出。該名前實習生表示，Apple 會咁做係因為希望將世界各地人才帶入 Apple，但唔希望外出工作為佢地帶來太大負擔。

員工薪酬一直成謎、又行超保密路線嘅 Apple，對於薪酬同工作風氣被爆一事就冇回應。消息真偽同被爆原因亦都不得而知喇！

全文刊於ezone